Қазақ тілін үйренуге уақытым жоқ – «Барыстың» бас бапкері Кравец

«Барыс» клубының бас бапкері Михаил Кравец қазақ тілін үйренудің оған аса қажет емес екенін тікелей айтты, деп хабарлайды Orda. kz. 

Құрлықтық хоккей лигасында өнер көрсететін «Барыс» клубының бас бапкері матчтан кейінгі баспасөз мәслихатында журналистердің: «Қазақ тілін үйреніп жатырсыз ба?» деген сұрағына қатысты «қажеті шамалы» деп қысқа қайырды.

«Бәрі орысша сөйлейді, кейде ағылшынша тілдесу жеткілікті екенін білесіз бе? Уақытым жетпейді. Онда маған қытай тілін де үйренуге тура келер еді. Сондықтан орыс және ағылшын тілдері жеткілікті деп ойлаймын. Оның үстіне бәрі бәрін түсінеді», – деді Кравец.

Айта кетейік, Михаил Кравец бұл қызметке осы жылдың тамыз айында Ғалым Мәмбеталиев қызметінен кеткеннен кейін тағайындалған. Соңғы ойында «Барыс» Қазанның «Ақ Барс» клубына 3:4 есебімен жеңілді. Команда үшінші кезеңнің басында 0:4 есебімен ұтылып, небәрі 140 секундта үш шайба соғып, есеп айырмасын қысқартты.

Еске салай кетейік, бұған дейін футболдан Қазақстан құрамасының бас бапкері болған Станислав Черчесов қазақстандық журналистің мемлекеттік тілде қойған сауалына: «Сіз французша сөйлеп тұрсыз ба?» деген кекетіп, қайта сұрақ қойған еді. Әлеуметтік желі қолданушылары оны жергілікті халықтың тілін менсінбейтінін ашық көрсетті деп бағалады.