«Қазақ оқушысы NASA-да»: Сымбат Барсағазы Марсқа бару миссиясын талқылады

Назарбаев Зияткерлік мектебінің оқушысы Сымбат Барсағазы жуырда АҚШ-тың Хьюстон қаласында орналасқан NASA-ның беделді United Space School бағдарламасы аясында тағылымдамадан өтті.

Бұл туралы оқу орны өзінің instagram парақшасында жариялады.

Екі апта бойы ол Марсқа адам қондыру миссиясы жобасын әзірлеп, ғарыш орталықтарына барып, өз идеяларын жетекші ғарышкерлер мен инженерлермен бірлесе отырып талқылады.

Сондай-ақ, Сымбат NASA-ның ардагер маманы Том Санзонмен кездесті. Санзон аэрокосмостық ғылымдарға 50 жылдан астам уақытын арнаған және Нил Армстронгты Айға ұшу миссиясына дайындаған ғалым. Сымбаттың айтуынша, мұндай командада жұмыс істеу тәжірибесі оны биоинженерия саласын зерттеуге құлшындырды. Әсіресе, ол Марстағы ғарышкерлердің өмір сүруін жақсарту мақсатында оттегіні өңдеудің жаңа технологияларын зерттеуді жоспарлап отыр.

«Бұл тағылымдама менің ғарыш биологиясы мен физикасы саласындағы білімімді кеңейтіп қана қоймай, сондай-ақ аз уақытта бейтаныс адамдармен ірі жобаларда жұмыс істеуді үйретті», – дейді Сымбат.