«Қазақ газ өңдеу зауытының» экс-директоры сотталды

«Қазақ газ өңдеу зауыты» ЖШС-нің бұрынғы директоры Б.А.Байшуақовқа үкім шықты, деп хабарлайды Orda.kz. 

Маңғыстау облысы Жаңаөзен ауданының соты экс-басшыны 4 жылға бас бостандығынан айырды. Тергеу мәліметіне қарасақ, Байшуақов кәсіпорынның сеніп тапсырылған мүлкін аукцион өткізбестен заңсыз сатқан. Кейін түскен қаражатты өзі иемденген. 

Байшуақов өмір бойы мемлекеттік қызметте және квазимемлекеттік сектор субъектілерінде қызмет атқару құқығынан айырылды. 

Болат Байшуақов 2023 жылдың ақпан айында осы зауытқа директор болып тағайындалды. Бұған дейін ол кәсіпорынның бас инженері болған. Өткен жылдың тамыз айында сыбайлас жемқорлыққа қарсы қызмет Байшуақовты 65 млн теңгеден астам ұрлық жасады деген күдікпен ұстады.

Еске салайық, 11 сәуір күні QazNews24 атты сатира парақшасының авторы Темірлан Еңсебекке сот үкім шығарды. Сот оны 5 жылға бостандығынан шектеу туралы шешім қабылдады.