Қатарлық бизнесмендер қазақтандық Tele2 операторын сатып алу жоспарын айтып берді

Қасым-Жомарт Тоқаев Ақорда резиденциясында Power International Holding (PIH) компаниясының жетекшілері Муатаз Әл-Хаят пен Рамез Әл-Хаятты қабылдады, деп хабарлайды Orda.kz. 

Кездесу барысында энергетика және телекоммуникация бағыттарындағы бірлескен инвестициялық жобаларды жүзеге асыру мүмкіндіктері талқыланды. Тараптар стратегиялық маңызы бар салалардағы серіктестікті кеңейтуге мүдделі екенін жеткізді.

Президенттің атап өтуінше, газды өңдеу мен тасымалдау, сондай-ақ электр энергиясын өндіру жобалары Қазақстан мен Қатар арасындағы инвестициялық ынтымақтастықтың өзегіне айналып отыр. Бұл бастамалар елдің энергетикалық қауіпсіздігін нығайтып, экономиканың тұрақты дамуына серпін береді.

Сонымен қатар Мемлекет басшысына PIH холдингінің телекоммуникация нарығындағы қызметін ұлғайту жоспары таныстырылды. Аталған жоба Mobile Telecom Service (Tele2) байланыс операторын сатып алу келісімі аясында жүзеге аспақ.

Қасым-Жомарт Тоқаев бұл қадам телекоммуникациялық инфрақұрылымды жаңғыртуға, қызмет сапасын арттыруға және халық үшін байланыс қызметтерінің қолжетімділігін кеңейтуге оң әсер ететініне сенім білдірді.

Кездесу қорытындысында тараптар өзара ынтымақтастықты одан әрі күшейтіп, келешегі зор инвестициялық жобаларды бірлесіп іске асыруға дайын екенін растады.

Оқи отырыңыз:

• Мемлекет басшысы Кувейт Әміріне құттықтау жеделхатын жолдады 
• Тоқаев референдумда барлық азаматқа тең жағдай жасауды тапсырды
• «Идеология емес, ұлттық мүдде»: Тоқаев Қазақстанның жаңа геосаяси таңдауын айтты