Қасым-Жомарт Тоқаев Қазақстан халқын Құрбан айт мерекесімен құттықтады

Мемлекет басшысы Құрбан айтты ізгілік пен адамгершілік, мейірімділік пен қайырымдылық, әділдік пен жауапкершілік мұраттарын паш ететін мереке деп атады, деп хабарлайды Ақорда.

«Бұл – барша мұсылмандар ерекше қастерлейтін және күтетін мереке, ол жасампаз бастамалар мен қайырымдылық істерді ілгерілетуге, адамгершілік құндылықтарды сіңіруге, қоғамның рухани бірлігін нығайтуға көмектесетін мереке» деп жазды  Мемлекет басшысы. 

Дәстүрлі дініміздің ұлттық мәдениетпен үйлесім тапқанына тоқталды.

«Қиын-қыстау заманда халқымыз ынтымақ танытып, мұқтаж жандарға көмек көрсетті. Ұлттың бұл баға жетпес қасиеті көктемгі алапат су тасқыны кезінде айқын көрінді. Бірлік пен келісімнің арқасында біз кез келген сынақты еңсере алатынымызға сенімдімін» деп жазды президент. 

Қасым-Жомарт Тоқаев барша азаматтарға денсаулық, амандық және табыс тіледі.

«Барлық үміттеріңіз бен армандарыңыз орындалсын! Құрбан айт құтты болсын!» деп құттықтады президент.