Қаржаубай Нұрымов Шерзаттың өліміне қатысы бар жасөспірімге кешірім берді

Шерзат Полаттың әкесі Қаржаубай Нұрымов 9 күдіктінің бірі — кәмелетке толмаған жасөспірімге кешірім беретінін мәлімдеді, деп хабарлайды Orda.kz.

Бұл туралы Қаржаубай Нұрымов журналист Руслан Өтепбайдың Elmenbirge атты бағдарламасында мәлім етті.

Алдағы сот процесінен не күтесіз деген сұраққа ол  «Алланың бұйырғаны болады», — деп қысқа қайырды.

«Ал жас балаға қатысты мен басында да айтқам, қазір де айтамын, кәмелетке толмаған баланың өміріне балта шапқым келмейді», — деді Нұрымов.

Журналистің жасөспірімге кешірім бересіз бе деген сұрағына ол былай жауап берді:

«Мен кешірімді сол кезде бергенмін ол балаға, қазір де кешірім беремін», —  деді Шерзаттың әкесі.

Айта кетейік, 10 сәуір күні Талғарда кісі қолынан қаза тапқан 16 жасар Шерзат Полатқа қатысты іс бойынша алдын ала сот тыңдалымы өтті. Сот Жетісу облысының қылмыстық істер жөніндегі мамандандырылған ауданаралық сотында (Талдықорғанда) өтті.

Тыңдалым барысында сот процесінің ашық өтетіні және алқабилер қатыспайтыны белгілі болды. Прокурор айыптау актісін оқып, тергеу изоляторында отырған тоғыз күдіктінің әрқайсысы қандай баппен айыпталып отырғанын жария етті.

Сондай-ақ, прокурор төбелес пен кісі өліміне ұласқан жанжалдың кімнен шыққанын атап өтті. Ең маңыздысы — Шерзат Полатты пышақтап өлтірді деген күдіктінің аты-жөні ресми түрде аталды.