Қарлы боран салдарынан Алматы-Қорғас тас жолының бір бөлігі жабылды

9 желтоқсан күні сағат 2:00-ден бастап республикалық маңызы бар Алматы-Шелек-Қорғас тас жолында көліктің барлық түрі үшін қозғалыс жабылды, деп хабарлайды Алматы облысы Төтенше жағдайлар департаментінің баспасөз қызметі.

«ҚазАвтоЖол ұлттық компаниясының мәліметінше, 9 желтоқсан күні сағат 2:00-ден бастап ауа райының нашарлауына байланысты (бұрқасын, қар) республикалық маңызы бар Алматы-Шелек-Қорғас тас жолында көліктің барлық түрі үшін қозғалыс 24-ші шақырымнан (Өтеген батыр ауылы) 254-ші шақырымнан (Айдарлы ауылы) бастап жабылды» деп хабарлады облыстық ТЖД.

«ҚазАвтоЖол» компаниясының мәліметінше, шектеу жеті облыстағы республикалық маңызы бар жолдардың 54 учаскесіне қатысты. Аталған жолдар жүк, дизельдік және қоғамдық көліктер үшін жабық.