Қарағандыда полиция бекетінде ес-түссіз жатқан майордың қасынан жалаңаш қыздың мәйіті табылды

Қарағанды қаласындағы учаскелік полиция бекетінен жалаңаш қыздың мәйіті табылды, деп хабарлайды Orda.kz.

«Патриот» telegram-арнасының хабарлауынша, қызбен бірге болған полиция майоры ес-түссіз жатқан. Ол шұғыл түрде ауруханаға жеткізіліп, жансақтау бөлімінде комада жатыр. Алдын ала болжам бойынша, полицей белгісіз заттың әсерінен комаға түскен.

Оқиға орнына келген аға учаскелік инспектор әріптесін бір бөлмеден, ал жалаңаш қызды екінші бөлмеден тапқан. Бекет дереу қоршауға алынып, ішке бөгде адамдар кіргізілмей отыр.

«Оқиға орнында ес-түссіз жатқан полиция қызметкері медициналық мекемеге жеткізілді. Мән-жайды анықтау үшін арнайы жедел-тергеу тобы құрылып, қызметтік тексеріс тағайындалды», – деп мәлімдеді өңірлік полиция департаментінің басшысы Нығмет Исмағұлов.

Қарағанды облыстық полиция департаменті бұл дерек бойынша қылмыстық іс қозғалғанын растады.