Қарағандыда бопсалаумен айналысқан топ ұсталды

Полицияның мәліметінше, олардың кем дегенде 12 қылмысқа қатысы бар.

ІІМ баспасөз қызметі хабарлағандай, топтың зардабын Қармет компаниясының қызметкерлері, кәсіпкерлер мен студенттер шекті. Оларды ұрып-соғып, дүние-мүлкін бопсалады, ақшасын тартып алды.

«Топтың барлық 25 мүшесі ұсталды. Оның ішінде ең белсенді 10 адам қамауға алынды. Тінту кезінде атыс қаруы мен жүзді қарулар, оқ-дәрілер, діни әдебиеттер және ірі көлемдегі ақша тәркіленді» деп хабарлайды Ішкі істер министрлігі.

Полицейлердің айтуынша, қазір олардың басқа да қылмыстарға қатысы бар-жоғы тексеріліп жатыр.