Қайрат Сатыбалдының Алматыдағы «Байсат» базары осы жолы да аукционда сатылмады

Экс-президент Нұрсұлтан Назарбаевтың немере інісі Қайрат Сатыбалдының Алматыдағы «Байсат» базары осы жолы да аукционда сатылмады, деп хабарлайды Orda.kz.

Қайтарылған активтерді басқару компаниясының хабарлауынша, саудаға қатысуға бірде-бір өтінім түспеген. Бұл базарды сату екінші мәрте сәтсіз аяқталып отыр.

Қыркүйектегі аукционда да 28 миллиард теңге бастапқы бағамен қойылған нысанға қызығушылық танытқан инвестор болмаған. Компания алдағы күндері жаңа сауда күнін жариялайтынын мәлімдеді. Ақпарат мемлекеттік ашық сауда платформаларында және компания ресурстарында жарияланбақ.

Еске сала кетейік, «Қайтарылған активтерді басқарушы компания» Қайрат Сатыбалдыға қарасты ЖШС-нің біріне тиесілі аяқталмаған бизнес орталығын сатқан еді. Сондай-ақ, бұған дейін Қайрат Сатыбалды іргесін қалаған медресеге жыл сайын бюджеттен 200 млн теңге құйылатыны белгілі болды.