«Қайрат» – «Реал Мадрид» ойынына Назарбаев әулеті келе ме?

30 қыркүйекте өтетін «Қайрат» – «Реал Мадрид» ойынына экс-президент Нұрсұлтан Назарбаевтың әулеті келеді деген ақпарат тарады, деп хабарлайды Orda.kz.

Алматылық «Қайраттың» Чемпиондар лигасындағы тартысты ойыны жанкүйерлер арасында ғана емес, ақпарат құралдарында да қызу талқылануда. Соңғы күндері БАҚ беттерінде клуб қожайыны Қайрат Боранбаев экс-президент Нұрсұлтан Назарбаевты әулетімен қоса матчты тамашалауға шақырды деген ақпарат тарады. 

Осыған байланысты Orda.kz «Қайрат» футбол клубының баспасөз қызметінен бұл мәліметтің қаншалықты шындыққа жанасатынын сұрастырды.

«Қайрат» ФК басшылығы атынан аталған тұлғаларға арнайы шақыру жолданды деген ақпарат шындыққа жанаспайды. Сонымен қатар кез келген жанкүйер белгіленген тәртіп бойынша матч билетін өз бетінше сатып ала алады», – деп мәлімдеді алматылық клубтың баспасөз қызметі.

Айта кетейік, 30 қыркүйек «Қайрат» Чемпиондар лигасының жалпы кезеңінде алғаш рет өз алаңында Еуропаның ең мықты клубтарының бірін қабылдайды. Билеттер ресми түрде 23 қыркүйектен бастап сатылымға шығады.

Сонымен қатар, күні кеше танымал кәсіпкер Тұрсынғали Алагөзов «Қайрат» – «Реал Мадрид» матчында алматылық клуб жеңіске жетсе, барлық футболшыларға көлік сыйлайтынын жеткізді.