«Қайрат» футбол клубтарының әлемдік рейтингіне шықты

Халықаралық футбол тарихы және статистикасы федерациясы (IFFHS) ресми сайтында әлемнің үздік 500 клубының жаңартылған рейтингін жариялады, деп хабарлайды Orda.kz.

IFFHS рейтингіне кірген Қазақстанның жалғыз клубы алматылық «Қайрат» болды. Ол 90,75 ұпай жинап, 240-шы орынды иеленді. Бұл ретте команда кейбір танымал клубтардан жоғары болып шықты. Мысалы, француздық «Ницца» 242-орынды, Испаниядан «Севилья» - 252-орынды, ал Англиядан «Вест Хэм» - 253-орынды иеленді.

Рейтингте көшбасшы орынды француздық «Пари Сен-Жермен» иеленді. Екінші орында мадридтік «Реал». Лондонның «Челси» командасы әлемнің үздік командаларының үштігіне кірді.

Аталған рейтинг 2024 жылдың 1 желтоқсаны мен 2025 жылдың 30 қарашасы аралығында командалардың өнер көрсетуін ескере отырып жасалған.

Бұрын хабарланғандай, алматылық «Қайраттың» қақпашысы  Темірлан Анарбеков Чемпиондар лигасының үздік ойыншылары рейтингінде Килиан Мбаппені басып озды. Алматылық «Қайрат» футбол клубының қақпашысы Темірлан Анарбеков биылғы Чемпиондар Лигасының үздік қақпашысы атанды. 22 жасында турнирдің төрт ойынында 24 сейв жасап, ең көп голдың алдын алған ойыншы ретінде статистикалық көрсеткіш бойынша көш бастап тұр.

Еске салсақ, «Қайрат» футболдан 2025 жылғы Қазақстан суперкубогын жеңіп алды. Сонымен бірге Чемпиондар лигасының алдында «Қайрат» сапына тағы бір бразилиялық ойыншы  қосылды.  
Осы айдың басында «Қайрат» (U19) командасы «Астана-Аренада» өткен UEFA жасөспірімдер лигасының жалпы кезеңінің алтыншы турында грек «Олимпиакосын» 2:0 есебімен жеңді.