Экс-судья Айгүл Сайлыбаеваның өліміне күдікті күйеуі мен енесі Мәскеуде болуы мүмкін

РФ тергеу комитетінің төрағасы Александр Бастрыкин қазақстандық экс-судья Айгүл Сайлыбаеваның өліміне қатысы бар тұлғалардың Мәскеуде болуы мүмкін деген нұсқаны тексеруді тапсырды, деп хабарлайды Orda.kz. 

Ресейдің федералдық арналарында Германияда Қазақстан азаматының кісі қолынан қаза тапқаны туралы ақпарат тарады. Тергеу нұсқасына сәйкес, марқұмның енесі мен бұрынғы күйеуі күдікке ілінген. Олар Германияда қылмыстық іс қозғалғаннан кейін Мәскеуге жасырынған болуы мүмкін. Қайтыс болған әйелдің ата-анасы РФ тергеу комитетінің төрағасына ресми өтініш жасаған. Содан кейін Мәскеудегі тергеу органдары процессуалдық тексеру бастады.

Айта кетейік, Айгүл Сайлыбаева 2024 жылдың маусым айында Германияда із-түзсіз жоғалып кеткен еді. Көп өтпей оның денесі Бенсхайм қаласына жақын жерден табылды. 
Айгүл Сайлыбаева соңғы жылдары Германияда күйеуі, екі жасар қызы Жаклин және енесі Наталья Донцовамен бірге тұрған. 4 маусымда таңертең Айгүл қызын балабақшаға апарған. Кешке оның мойнында, беті мен қолында пышақ жарақаттары бар денесі табылды.

Былтыр 10 желтоқсан күні Қазақстан Ішкі істер министрлігі Наталья Донцова мен оның ұлы Александр Донцовқа іздеу салды. Бұл іс Талдықорғанда тіркелген. Марқұмның күйеуі Ресей азаматтығын алған болуы мүмкін.