Яна Легкодимованы өлтірді деген айыпталушыларға жаңа ауыр айып тағылды

Атырауда Яна Легкодимованың өліміне қатысты сот процесі жалғасып жатыр. Марқұмның сүйектері бұған дейін Жайық өзенінің жағасынан табылған. Тергеу кезінде сол жерден Янаға тиесілі киім де анықталған, деп хабарлайды Orda.kz.

Сотта Ризуан Қайыржановтың көлігін тексеру нәтиже бермегені айтылды. Тергеу дерегінше, ол келесі күні таңертең көлікті мұқият жуып, іздерді жойған. Ал екінші айыпталушы Алтынбек Катимов оқиғадан кейін ауылына кетіп қалған.

Іс материалдарын зерделегеннен кейін прокурор айыптауды күшейтті. Бұған дейін Қайыржанов ҚР Қылмыстық кодексінің 99-бабы 2-бөлігінің 7-тармағы («Алдын ала сөз байласу арқылы адамдар тобы жасаған кісі өлтіру») және 188-баптың 2-бөлігінің 1-тармағы («Ұрлық») бойынша айыпталған. Катимовке де осы баптармен қатар 99-баптың 2-бөлігінің 8-тармағы («Адам жалдау арқылы кісі өлтіру») бойынша айып тағылған еді.

Енді екеуіне де жаңа, ауыр айыптар тағылды.

Жаңартылған айыптау актісінде олардың екеуі де ҚР ҚК 99-бабы 2-бөлігінің 7 және 8-тармақтары («Алдын ала сөз байласу және адам жалдау арқылы кісі өлтіру») және 202-баптың 2-бөлігінің 6-тармағы («Алдын ала сөз байласу арқылы бөтеннің мүлкін қасақана жою») бойынша жауапқа тартылып отыр.

Айыптау нұсқасы бойынша, қастандық жасалған күні Қайыржанов Яна Легкодимованы өз пәтеріне шақырған. Сол жерде ол Катимовпен бірге қыздан үндемеуді талап етіп, қорқытқан. Тергеушілердің айтуынша, қыз олардың талабын орындағанымен, айыпталушылар бәрібір оны өлтірген.

28 қазанда өткен сот отырысында осы жылдың 20 маусымында өзен жағасында Яна Легкодимованың сүйегін тапқан ерлі-зайыптылардан жауап алынған.