Ирандағы қақтығыстан соң қазақстандықтар Әзербайжан арқылы эвакуацияланды

Иранда бір апта бойы болып жатқан қанды қақтығыстардан кейін қазақстандық азаматтардың бір бөлігі Әзербайжан арқылы эвакуацияланды, деп хабарлайды Orda.kz.

Report агенттігінің дерегінше, 17 елден 600-ден астам адам Ираннан Әзербайжан аумағы арқылы шығарылды. «Гуманитарлық дәліз» бес күннен бері тұрақты түрде жұмыс істеп тұр. Израиль мен Иран арасындағы қарулы шиеленіс басталғалы бері жүздеген адам «Астара» шекара бекеті арқылы қауіпсіз жерге өтті.

«Эвакуацияланғандар қатарында Әзербайжан азаматтарынан бөлек, 17 елдің өкілдері бар. Олардың ішінде ТМД елдерінің, мысалы, Ресей, Беларусь, Қазақстан, Қырғызстан, Тәжікстан және Өзбекстан да азаматтары бар. Сонымен қатар, сұраныс бойынша Германия, Испания, Италия, Сербия, Румыния және Португалия сияқты Еуропа елдерінің азаматтары да эвакуацияланды. Үйіне оралғандар арасында АҚШ, БАӘ, Қытай және Вьетнам азаматтары бар. Бірақ олардың саны аз», — деп жазды Report агенттігі.

Еске салайық, Қазақстан Израильдегі ахуалға байланысты шұғыл байланыс желісін іске қосты. Сыртқы істер министрлігі ресми мәлімдеме жасап, Қазақстан билігі алты елдің әуе кеңістігіне ұшуға уақытша тыйым салғанын хабарлады.