Иранда үкіметке қарсы шеруге қатысқан үш адам дарға асылды

Иранда қаңтар айындағы жаппай наразылықтарға қатысқан үш адам құқық қорғау органдарының екі қызметкерін өлтіргені үшін дарға асылды, деп хабарлайды Orda.kz Tasnim агенттігіне сілтеме жасап.

Агенттік мәліметінше, сотталғандар қаңтарда өткен наразылық кезінде құқық қорғау органдарының қызметкерлерін өлтірген. Тіпті, тергеу барысында қылмысқа барғанын мойындаған. Сонымен қатар, оларға АҚШ пен Израильдің мүддесіне әрекет етті деген айып тағылған.

Еске салсақ, Ирандағы наразылықтар 2025 жылдың желтоқсан айының соңында ұлттық валютаның құнсыздануына байланысты басталған еді. Кейін ол жаппай тәртіпсіздік пен билікке қарсы наразылыққа ұласты. Елде интернет жұмысы шектелді. Иран билігінің мәліметінше, елдегі наразылықтар барысында кемінде 5 мың адам қаза тапқан, олардың ішінде шамамен 500-і қауіпсіздік күштерінің қызметкерлері.

Сонымен қатар, HRANA құқық қорғау ұйымы 3 308 адам қаза тапқаны расталғанын, тағы 4 мыңнан астамының жағдай тексеріліп жатқанын мәлімдеді. Құқыққорғаушылардың дерегінше, ұсталғандар саны 24 мыңнан асады.

Оқи отырыңыз:

• Ирандағы наразылықтың мақсаты монархты қайтару емес
• Иранда наразы халық Солтүстік Хорасан прокурорын тірідей өртеп жіберді
• Иран соғысында қол ұшын бермеген еуропалықтарға Трамптың өкпесі қара қазандай