Иранда наразы халық Солтүстік Хорасан прокурорын тірідей өртеп жіберді

Iranwire басылымының жазуынша  Иранда наразылықтар Солтүстік Хорасан провинциясының прокурорын тірідей өртеп жіберген, деп хабарлайды Orda.kz.       

 Журналистердің айтуынша, прокурор мен оның командасын контейнерге қамап, өртеп жіберген. Құтқарушылар халық арасынан өтіп, құқық қорғау қызметкерлерін құтқара алмады, деп келтірді gazeta.ru таратылған ақпаратты.

 Оқиғалардың басқа егжей-тегжейі белгісіз.

Иранда желтоқсан айынан бері басталған наразылықтар жалғасып жатыр. Олар жергілікті валюта — иран риалының құнсыздануы мен инфляцияның өсуіне байланысты туындаған. Алайда 8 қаңтарда жаппай сипат алды: әртүрлі деректерге сәйкес, ел бойынша наразылыққа бірнеше мыңнан жарты миллионға дейін адам шыққан. Қаза тапқандар саны ондаған адам деп бағаланады, ал ұсталғандар саны жүздеп саналады.

Ирандағы наразылықтар желтоқсан айының соңында иран риалы бағамының төмендеуі мен бағаның күрт қымбаттауы аясында басталды. Алғашында Тегеранда митингке саудагерлер мен дүкен иелері шықты, олар наразылық белгісі ретінде сауда орындарын жапты. Көп ұзамай митингілер көше наразылықтарына ұласып, кейін университет аумақтарына тарады. Ұрандар да саяси сипат алып, Ирандағы қазіргі саяси жүйеге қарсы бағытталды. Бұл наразылықтар 2022 жылдан бергі ең ауқымдысы болды. Сол жылы 22 жастағы  Махса Амини «хиджабты дұрыс тақпағаны» үшін ұсталғаннан кейін қайтыс болып, елде жаппай демонстрациялар өткен еді.

NetBlocks мониторинг қызметінің мәліметінше, наразылық білдірушілер мен қауіпсіздік күштері арасында бірнеше қалада қақтығыстар болғаннан кейін, қазіргі уақытта Иранда интернет толықтай өшірілген.

Tasnim ақпарат агенттігі FARAJA барлау ұйымына телінген бейнежазбаны жариялады. Онда «үйлерінің терезелерінен ұрандатқан адамдардың» анықталғаны, оларға ескерту жасалғаны және «қажет болған жағдайда» қамауға алынатыны айтылған. Сол ұйымға қатысты тағы бір мәлімдемеде «барлық әрекеттер барлау қызметінің бақылауында» екені және тиісті шаралар қабылданатыны атап көрсетілген.
 
Бұған дейін Тегеран прокуроры жаппай наразылық акциялары мен тәртіпсіздіктерге қатысқандарға қатысты қатаң шаралар қолданылатынын мәлімдеді. Прокурор оларды «террористер» және «мемлекетке қарсы соғыс жүргізіп жатқандар» деп атады. 

Тақырыпқа қатысты ұсынамыз:

• Прокурор оларды террористке теңеді: Ирандағы тәртіпсіздікке қатысқандарға өлім жазасы қаупі төніп тұр
• Ирандағы наразылықтың мақсаты монархты қайтару емес