Иран Ормуз бұғазы арқылы танкерлерді ақылы өткізе бастады

Иран Ормуз бұғазы арқылы танкерлерді өткізуді қайтадан бастады, бірақ бұл енді ақылы түрде жүргізіліп жатыр, деп хабарлайды Orda.kz.       

Тегеран Ормуз бұғазы арқылы сауда кемелерін өткізу үшін «баж салығын» енгізді. Бұл – әлемдегі мұнай жеткізілімінің әр бесінші баррелі және сұйытылған табиғи газ (СТГ) тасымалының 30%-ға дейінгі бөлігі өтетін аса маңызды теңіз жолы.

Lloyd’s List дереккөздерінің хабарлауынша, жаңа тәртіп бойынша барлық кемелер Тегеран бақылауындағы Ларак аралы маңындағы Иранның аумақтық суларымен өтіп, Ислам революциясы сақшылары корпусының (ИРСК) бақылауында болады және алдын ала «ілеспе қызмет» үшін ақы төлеуі тиіс.

10 наурызда ИРСК әскери-теңіз күштерінің қолбасшысы, контр-адмирал Алиреза Тангсири барлық кемелер Ормуз бұғазы арқылы өту үшін Ираннан рұқсат алуы керек екенін мәлімдеді. Оның айтуынша, мұндай рұқсат АҚШ пен Израиль елшілерін елден шығарған мемлекеттерге ғана берілмек. Үш күннен кейін қауіпсіздік кепілдігі Ирак кемелеріне де ұсынылды.

Енді жағдай өзгерді, бұғаз арқылы жүзіп өткің келсе – ақысын төле. Lloyd’s мәліметінше, әзірге тек бір танкер «қауіпсіз өту» үшін Иран билігіне 2 млн доллар «баж» төлеген. Иранға қарсы санкциялар жағдайында бұл төлемнің қалай жүзеге асырылғаны белгісіз.

Дереккөздердің айтуынша, Үндістан, Пәкістан, Ирак, Малайзия және Қытай жаңа механизмді пайдалану бойынша Иранмен келіссөздер жүргізе бастаған.

Бұған дейін АҚШ Ормуз бұғазын қайта ашу үшін Иранның оңтүстік жағалауына жақын орналасқан бір немесе бірнеше аралды басып алу мақсатында теңіз жаяу әскерін пайдалануы мүмкін екендігі хабарланған болатын. 

Оқи отырыңыз:

• АҚШ Ормуз бұғазын ашу үшін теңіз жаяу әскерін пайдалануы мүмкін
• Ормуз бұғазымен өтетін кемелерді сақтандыру бағасы қымбаттады
• Иран СІМ: Ормуз бұғазына мина қойып жатқан жоқпыз 
• Иран Ормуз бұғазы арқылы Үндістан кемелеріне өтуге рұқсат берді