IPHR Қазақстанға Темірлан Еңсебекті босатуға шақырды

Халықаралық құқық қорғау ұйымы International Partnership for Human Rights (IPHR) QazNews24 сатиралық парақшасының авторы Темірлан Еңсебекті босатуға шақырды, деп хабарлайды Orda.kz.

IPHR мәлімдемесінде «араздық қоздыру» сияқты қылмыстық заңнамадағы анық емес тұжырымдардың көбіне билікті сынаушыларды басу үшін қолданылатыны атап өтілген.

Темірлан Еңсебекке «Йоу, орыстар» әнін жариялағаны үшін айып тағылып жатыр. Бұл сатиралық пост ресейлік тележүргізуші Тина Канделакидің Қазақстандағы орыс тіліне қатысты айтқан пікіріне жауап ретінде жазылған. Ән әлеуметтік желілерде әлі де қолжетімді және заңмен тыйым салынбаған. Ал құқық қорғаушылар бұл қудалауды орынсыз деп санайды.

IPHR сонымен бірге Темірлан Еңсебекті қолдау мақсатында «Сатира – қылмыс емес» деген ұрандармен өткен пикеттерге қатысушылардың әкімшілік жазамен қамауға алынғаны мен айыппұл салынғанын сынады. Наразылық білдірушілер бұл істі билікке қарсы өткір сатирамен байланыстырып отыр.

Ал полицияның айтуынша, Енсебек сатира үшін қамалмаған, ал пикетке қатысқандар бейбіт жиналыс өткізу ережелерін бұзғаны үшін жауапқа тартылған.

IPHR Қазақстандағы сөз бостандығы мен балама пікірлерге қысымның күшейіп келе жатқанын атап өтті. Ұйым билікті Темірлан Еңсебекті және оны қолдағаны үшін ұсталған азаматтарды босатуға, сондай-ақ елдегі заңнаманы халықаралық стандарттарға сәйкестендіруге шақырды.

Темірлан Еңсебек 17 қаңтарда ұсталып, екі айға қамауға алынды. Оған екі жылдан жеті жылға дейін бас бостандығынан айыру жазасы қарастырылған. Оның қорғаушысы Жанар Балғабаеваның айтуынша, тергеу ісі әлеуметтік желілерді бақылаған полицейдің рапорты негізінде басталған.

Еске сала кетсек, сатиралық пабликтің авторы Темірлан Еңсебек  түрмеден өзінің қылмыскер емес екенін айтып хат жазған болатын.