ІІМ Kyzdar.net сайтын неге біржола бұғаттай алмай отыр?

Kyzdar.net сайты заңсыз контент таратқаны үшін бірнеше рет бұғатталғанымен, қайта-қайта желіге шығып отырады. Ішкі істер министрлігі сайт әкімшілігінің домендерді жиі ауыстыруы кедергі болып жатқанын айтады, деп хабарлайды Orda.kz.

Ресми дерек бойынша, сайттың күнделікті табысы 2 миллион теңгеге жеткен.

«Бұл бағытта ІІМ тиісті сұраныс хаттарды тұрақты түрде жолдап отырады. Қазіргі таңда екі министрліктің бірлескен жұмыс тобы құрылып, «Kyzdar.net» сайты мен оның балама домендерін жедел әрі жүйелі түрде бұғаттаумен айналысып жатыр. Бірақ сайт әкімшілігі домендер мен сілтемелерін үнемі өзгертіп, қайтадан қолжетімді етуге тырысады. Осы себепті жаңа парақтарды анықтап, шектеу қою жұмыстары тоқтаусыз жүргізіліп жатыр»,  деп түсіндірді министрлік. 

Айта кетейік, 2023 жылдың наурызында Kyzdar.net сайтының негізгі ұйымдастырушылары қолға түскен еді. Анықталғандай сайт күн сайын шамамен 2 миллион теңге табыс әкеліп отырған. Жылдық пайдасы болса, 2 миллиард теңгеге жуықтаған.

Еске сала кетейік, Ulysmedia.kz сайтының бас редакторы Самал Ибраеваның жалған профилі Kyzdar.net сайтында пайда болған еді. Ибраева сол кезде сайтта фейк-анкета жеке өмірге қол сұғу, ар-намысты қорлау және іскерлік беделге нұқсан келтіру әрекеттерінің көп екенін айтқан еді.