ХОК басшысы Томас Бах қайта сайланудан бас тартты

Халықаралық Олимпиада комитетінің (ХОК) президенті Томас Бах президенттік мерзімін ұзарту үшін Олимпиада хартиясына өзгерістер енгізбейтінін мәлімдеді. Бұл туралы ол Парижде өткен ХОК сессиясында айтты.

10 тамызда Парижде өткен ХОК 142-ші сессиясында Томас Бах 2025 жылы қызметінен кететінін мәлімдеді. «Жаңа уақыт жаңа көшбасшыларды қажет етеді», - деді ол.

Олимпиада хартиясына сәйкес, президенттің өкілеттік мерзімі ең көбі он екі жылмен шектеледі. Томас Бах Халықаралық Олимпиада комитетін 2013 жылдан бері басқарып келеді. Мумбайда өткен ХОК сессиясында ұйымның бірнеше мүшесі Бахтың жаңа мерзімге сайлануына мүмкіндік беретін Олимпиада хартиясына түзету енгізуді ұсынды.

«Отбасыммен ақылдасып, талқылаудан кейін мен мандатымды мерзімінен асырмау керек деген қорытындыға келдім», - деді 70 жастағы Томас Бах Парижде ұйымның сессиясында.

Ол жасына байланысты өзін «мықты капитан» ретінде сезінбейтінін айтты.

ХОК жаңа президентін сайлау ұйымның 2025 жылдың наурыз айында Грекияда өтетін 143-сессиясында өтеді. Бұл лауазымға үміткер болу ниетін әлі ешкім жариялаған жоқ.