Грузияда наразылық акциясын ұйымдастырғандар қамалды

Грузияда наразылық акциясын ұйымдастырғандар қамауға алынды, оларға 9 жылға дейін бас бостандығынан айыру қаупі төніп тұр.

Грузия Ішкі істер министрлігі 4 қазанда Тбилисиде жергілікті сайлау кезінде өткен наразылық акциясын ұйымдастырған комитеттің бес мүшесі түгелдей ұсталғанын мәлімдеді, деп хабарлайды Orda.kz NGnwsgeorgia-ға сілтеме жасап.

Қамауға алынғандар: Ираклий Надирадзе, Муртаз Зоделава, Лаша Беридзе, Паата Манджгаладзе және Паата Бурчуладзе.

Ұйымдастырушыларға билікті күшпен құлату шақыру және топ болып зорлық-зомбылық ұйымдастыру айыптары тағылып отыр. Бұл — Грузия заңнамасына сәйкес, тоғыз жылға дейін бас бостандығынан айыру жазасын қарастыратын қылмыс.

Грузия ІІМ басшысының орынбасары Александр Дарахвелидзенің айтуынша, Бостандық алаңында өткен митинг кезінде зорлық сипатындағы ұрандар айтылған. Наразылардың бір бөлігі Атонели көшесіндегі президент резиденциясына басып кіруге тырысқан. Полиция көз жасаурататын газ және су атқыштар қолданған.

Наразылардың кейбірі көршілес көшелерде баррикадалар орнатып, құқық қорғау органдары қызметкерлеріне тас пен фейерверк лақтырған. Денсаулық сақтау министрлігінің мәліметінше, 21 полиция қызметкері мен 6 наразылық білдіруші ауруханаға жеткізілген.

«Бейбіт революция» ретінде жарияланған акция күшпен таратумен аяқталды. Ұйымдастырушылар үкіметті заңсыз деп тануды және билікті тапсыруды талап еткен.