Голландия прокурорлары Қазақстандағы сыбайлас жемқорлықты тергеп жатыр

Голландиялық прокурорлар жер түбін тереңдету, мелиорациялау және жасанды аралдар салуға маманданған теңіз мердігері Ван Оордты тергеп жатыр. Іс Қазақстандағы ықтимал сыбайлас жемқорлық оқиғасына қатысты, деп хабарлайды Orda.kz.

Голландиялық NL Times басылымының хабарлауынша, Ван Оорд тергеуге қатысты толық түсініктеме беруден бас тартты. Ван Оордқа Қазақстандағы тендерлерді жеңіп алуға көмектескен фирманың делдалы «бұрынғы президент Нұрсұлтан Назарбаевпен байланысы бар компанияға» ақша аударған болуы мүмкін.

Ван Оорд 2015 жылы Қазақстанмен жасалған келісімшарттардан жарты миллиард доллар табыс тапқан. Тендерлер мұнай-газ саласына, сондай-ақ Каспий теңізіндегі 72 шақырымдық канал құрылысына қатысты болды. Голландия прокуратурасы күдіктеніп отырған қосалқы мердігер компаниямен жұмысты мерзімінен бұрын тоқтатқан. Ол келісім-шартты бұзғаны үшін өтемақы ретінде 5 миллион еуро және бәсекелестікке қарсы келісім шарттарына сәйкес тағы 19 миллион еуро алды.

«Делдалдар әдетте өз жұмысы үшін келісімшарт бағасының белгіленген пайызын алады, кейде ішінара пайда үлесі түрінде. 2017 жылы біз қатаң талаптарды қолдануды бастаған кезде қосалқы мердігерлермен бірқатар келісімдер жаңартылмады, ал бір келісімшарт мерзімінен бұрын бұзылды» деп келтіреді Ван Оордтың сөзін  NL Times. 

Тергеудің егжей-тегжейлері әлі жарияланған жоқ.

2024 жылдың басында Қазақстан сыбайлас жемқорлықұа төзбеудің жаһандық индексінде беделді орынға көтерілгенімен, салыстырмалы түрде сыбайлас ел болып қала беретіні белгілі болды.