Германиядағы ең ірі тонау: Ұрылар үптеп кеткен қаражат тоқсан миллионға жетіп жығылады

Германияның батысындағы Гельзенкирхен қаласында ел тарихындағы ең ірі банк тонауы тіркелді. Қаскөйлер Sparkasse банкінің сақтық қоймасындағы мыңдаған сейф ұяшықтарын бұзып, ішінен қомақты қаражат алып кетті, деп хабарлайды Orda.kz. 

Қылмыскерлер бетон қабырғаны тесіп, банк қоймасы мен автотұрақ арасынан өткел жасаған. Олар 3 200-ге жуық сейфті ашып үлгерген. Алдын ала мәлімет бойынша, келтірілген шығын мөлшері 10 млн-нан 90 млн еуроға дейін жетуі мүмкін.

28 желтоқсан күні кешке куәгерлер автотұрақ сатысынан үлкен сөмкелерді арқалаған ер адамдарды байқаған. Ал келесі күні таңертең бақылау камералары қара түсті Audi RS6 көлігін тіркеген. Автокөліктегілер бетперде киген, ал нөмірі ұрланған болып шықты.

Полиция бұл қылмыс кәсіби түрде ұйымдастырылғанын мәлімдеді. Сейфтерден қолма-қол ақша, алтын және бағалы әшекейлер ұрланған.

Әр сейф максимум 10 300 еуроға дейін сақтандырылған. Жалпы 2 700 адам зардап шеккен.

Айта кетейік, Луврдағы «ғасыр тонауы» 18 қазанда болды. Ол кезде баға жетпес француз корольдерінің асыл тастары ұрланған еді. Парижде қылмыскерлер жеті минут ішінде  88 миллион еуроға жуық бағалы заттарды тонап, Лувр қазынасын үптеп кеткеннен кейін мұражай басшылығы қалған бағалы заттарды жер астына жасырды.