Германияда қаза тапқан қазақ әйелінің күйеуі мен енесіне іздеу жарияланды

Қазақстан Ішкі істер министрлігі Наталья Донцова мен оның ұлы Александр Донцовқа іздеу салды. Бұл іс Талдықорғанда тіркелген, деп хабарлайды Orda.kz.

Олар Германияда қастандықпен қаза тапқан бұрынғы судья Айгүл Сайлыбаева ісінің фигуранттары ретінде саналып отыр. Айгүл Сайлыбаеваның денесі 2024 жылдың 16 маусымында Германиядағы Эрлахе көлінің маңынан табылған. Тергеушілер оны басқа жерде өлтіріп, кейін сол жерге әкелген болуы мүмкін деп болжайды.

Марқұмның туыстары Германияда да отбасылық зорлық болған деп есептеген. Айгүлдің ағасының айтуынша, ол ұзақ уақыт бойы тұрмыстық зорлық-зомбылыққа ұшыраған, ал оның жұмбақ өлімі, жүкті болған кезінде болды. Биыл маусымда Германия полициясы күдіктілер қатарында әйелдің енесі, Қазақстан азаматы Наталья Донцованы ұстауға ордер дайындап, оны іске тікелей қатысы бар адам деп атады.

Еске сала кетсек, Германияда Астана сотының бұрынғы судьясы Айгүл Сайлыбаева жоғалып кеткен болатын. Кейін оның мәйіті табылды. Ал оның күйеуі Ресей азаматтығын алған болуы мүмкін.