Газа секторынан 28 қазақстандық елге оралды

Қазақстан Палестина халқына қосымша материалдық гуманитарлық көмекті арнайы әуе көлігімен жеткізді.

Дәл осы ұшақ Газа секторынан эвакуацияланған 28 Қазақстан азаматы мен олардың отбасы мүшелерін алып қайтты.

Бұл туралы сыртқы істер министрлігі хабарлайды.

«Барлық міндетті рәсімдер аяқталғаннан кейін эвакуацияланған Қазақстан азаматтарына қажетті құқықтық, медициналық және басқа да көмектер көрсетіледі. Осыған дейін, 17 қарашада азаматтардың бірінші тобы, оның ішінде 99 адам дәл осындай жолмен қауіпсіз жерге көшірілді» деп атап өтті СІМ.

Гуманитарлық көмекке салмағы 38 тоннадан асатын азық-түлік, төсек-орын жабдықтары, дәрі-дәрмек және медициналық бұйымдар кіреді. Ол Мысырдың Қызыл Ай қорына берілді. БҰҰ-ның Таяу Шығыстағы Палестиналық босқындарға көмек көрсету және жұмыс жөніндегі агенттігі Мысыр билігімен бірлесіп Қазақстаннан жеткізілген көмекті мұқтаж палестиналықтарға аударады.