Газ бағасы қымбаттауда: кімдер жеңілдік алады?

Шымкент пен Батыс Қазақстанда «Әлеуметтік әмиян» пилоттық жобасы аясында әлеуметтік және тұрғын үй көмегін алатын азаматтарға табиғи газ ақысына жеңілдік алуға мүмкіндік беріледі, деп хабарлайды Orda.kz.

Энергетика министрлігінің айтуынша, пилоттық жоба аясында көмек алатын азаматтарға eGov Mobile қосымшасын орнату жөнінде нұсқаулықпен SMS хабарлама келеді. Осы қосымшада олар газды төлеуге арналған жеңілдік ваучерін іске қосып, ол автоматты түрде «QazaqGaz Aimaq» АҚ шотына аударылады. Ай сайынғы газ тұтыну көлеміне байланысты жеңілдік мөлшері анықталады.

Жоба 6 айға созылады, оның қорытындысы бойынша бастаманы Қазақстан бойынша кеңейту туралы шешім қабылданады. Осы орайда айта кетейік, елімізде газ тарифтері өсіп келеді, шілде айында энергетика министрі Алмасадам Сәтқалиев газ бағасының 14% өсетінін ескерткен болатын.