Футболшылар тыйымға қарамастан бәс тігіп, ереже бұзған

Қазақстанның Бас прокуратурасы Футбол федерациясы мен бірқатар футбол клубтарына тексеру жүргізіп, келісілген матчтарды ұйымдастыру және ойыншылардың букмекерлік кеңселерге бәс тігуіне қатысты бірқатар заңбұзушылықтарды анықтады. Бұл туралы Бас прокурор Берік Асылов мәжіліс депутаты Абзал Құспанның депутаттық сауалына жауап ретінде мәлімдеді, деп хабарлайды Orda.kz.

Футболшылар мен бапкерлердің еңбек шарттарында бәс тігуге тікелей тыйым салынғанына қарамастан, олар букмекерлік ойындарға қатысқан. Мәселен, Ақтауда тоғыз футболшы жалпы сомасы 110 миллион теңгеге бәс тіккен жағдайлар тіркелген.

Тексеру қорытындысы бойынша, 2025 жылғы 2 сәуірде прокуратура Федерацияға заңбұзушылықтарды жою туралы ұсыныс енгізді. Жауап ретінде Футбол федерациясы аудит, қаржы және этика комитетін құрып, қаржылық тәртіпті күшейтуге бағытталған 33 іс-шараны қамтитын «жол картасын» әзірледі.

Сонымен қатар, Федерация бірқатар кадрлық шешімдер қабылдады: әкімшілік басшылығы, басқарушы директор, заң, операциялық және маркетинг департаменттерінің директорлары, сондай-ақ қауіпсіздік және интегритиді қамтамасыз ету қызметінің басшысы қызметтерінен босатылды. Бірқатар қызметкерлердің лауазымы төмендетілді.

2025 жылғы 20 мамырдағы жағдай бойынша Футбол федерациясы заңбұзушылықтарды жою, қаржылық бақылауды күшейту және футболды дамытуға қойылған жаңа міндеттерге сай құрылымды оңтайландыру жұмыстарын жалғастырып жатқанын мәлімдеді.