Есірткі тасымалдаған парақор прокурорлар ұсталды

Бірі есірткі тасымалдады, екіншісі пара алды деген күдікке ілінген прокурор Олжас Әлиев және Самат Қаниев ұсталды, деп хабарлайды Orda.kz.

Ұлттық қауіпсіздік комитеті Қызылорда облысы прокуратурасының қызметкері Олжас Әлиевті ұстады.

Ол марихуана сатты деген күдікке ілінген. Орданың дереккөздері Әлиевтің Құқықтық статистика және арнайы есепке алу комитеті бөлімінде қызмет атқарғанын хабарлады. Ол қамауға алынды.

Ұлытау облысының прокуроры Самат Қаниев те қамауға алынды. Ол бір миллион теңге пара алған-мыс. Тергеу ол ақшаны жәбірленушіден «істі шешуге көмектесемін» деп уәде етіп алған деп есептейді. Самат Қаниев туған өлкесі Қызылорда облысында ұсталды.

Бас прокуратура Қызылорда облысында есірткі заттарын сатты деген күдікпен ұсталған азаматтың сол сәтте құқық қорғау органдарының қызметкері болмағанын мәлімдеді.

«Сонымен қатар, Қызылорда облысы бойынша ҰҚКД мен Бас прокуратураның Ішкі қауіпсіздік департаменті бірлесіп жүргізген жедел шаралардың нәтижесінде Ұлытау облысында Қылмыстық кодекстің 190-бабы («Алаяқтық») бойынша сотқа дейінгі тергеп-тексеру тіркелді. ҚПК-нің 201-бабына сәйкес, өзге мәліметтер жариялауға жатпайды», — деп толықтырды ведомство.