Ертіс өзені арқылы Павлодар мен Омбы арасында жолаушылар тасымалдануы мүмкін

Павлодар мен Омбы арасында жолаушылар тасымалдау туралы бастаманы Ресейдің Омбы облысының губернаторы Виталий Хоценко ұсынды, деп хабарлайды Orda.kz.

1 шілде күні Омбы облысының делегациясы Павлодарда болды. Сапардан кейін Виталий Хоценко Telegram-арнасында бірнеше жазба жариялап, Ертіс өзенін екі ел арасындағы сауда байланысын нығайту үшін пайдалануға болатынын жеткізді.

«Шекаралық өзеннің әлеуеті жоғары, кеме қатынасын дамытуға мүмкіндік бар. Біз су жолдары арқылы жүк тасымалдауға, соның ішінде ауыл шаруашылығы өнімдерін жеткізуге мүдделіміз. Бұл өңірдегі өнім көлемін арттыруға жол ашар еді. Болашақта жолаушылар тасымалын ұйымдастыру тұрғысынан да үлкен мүмкіндік бар. Бұл туризмнің дамуына оң ықпал етеді»  деп жазды Виталий Хоценко.

Оның айтуынша, қазіргі таңда Қазақстан – Омбы облысының басты сыртқы сауда серіктесі. Дегенмен, негізгі жүк тасымалы әлі күнге дейін автокөлік және теміржол арқылы жүзеге асып отыр. Хоценконың пікірінше, өзен арқылы тасымал елдер арасындағы жеткізу жылдамдығын арттырып, шығынды азайтады.

«Ертіс экономикалық күн тәртібіне қайта оралуы тиіс. Бұл – тек өңірдегі ғана емес, халықаралық маңызы бар логистикалық бағыт. Ертіс Ресейдің солтүстік және Сібір аймақтарын Қазақстанмен толыққанды байланыстыра алады», – деді ол.

Айта кетейік, Омбы делегациясы Павлодарға дәл осы Ертіс өзені арқылы шағын кемемен келген.

Еске сала кетсек, Orda.kz тілшісі Ресейдегі қазақтардың жай-күйі, тұрмысы, мәдени өмірі жайлы білу үшін Омбы қазақтарына хабарласты. Ресейдегі ана тілімізде шығатын жалғыз газеттің бас редакторы, «Омбы қазақтары» атты мәдени, қоғамдық ұйымның жетекшісі Әшенова Торғын тілшімізге сұхбат берді. Еліміздегі соңғы жылдардағы жаппай қазақ тіліне деген құштарлық пен ұлттық киімдерге деген ерекше сұраныс Ресей қазақтарына да өзінше әсер етіпті. Кезінде қазақ ағартушылары білім алған жердегі қазақтардың ұлтқа деген махаббаты мен болмысын сақтауға деген ұмтылысы жайлы мақаламыздан оқыңыз.