Енді жоғары сынып оқушылары гинеколог қабылдауынан өтеді

Қазақстанда жоғары сыныптағы қыз балаларға акушер-гинеколог қабылдауына бару мүмкіндігі енгізілуі қарастырылуда, деп хабарлайды Orda.kz.

Бұл туралы денсаулық сақтау бірінші вице-министрі Тимур Сұлтанғазиев мәлімдеді. Оның айтуынша, министрлік жоғары сынып оқушыларына арналған акушер-гинеколог кеңесін ұйымдастыру мәселесін зерттеп жатыр.

13 қазанда Ақтөбе облысында 9-сынып оқушысының босанғаны белгілі болды. Өңірдің білім басқармасы қыздың үш рет медициналық мекемеге жүгінгенін, бірақ дәрігерлер оның жүкті екенін анықтамағанын хабарлаған еді.

Денсаулық сақтау министрлігінің өкілі жаңа бастама осы оқиғаға байланысты емес екенін атап өтті.

«Қазір гинеколог қабылдауын енгізу мүмкіндігі қарастырылып жатыр. Жоғары сынып оқушыларына арналған акушер-гинеколог қабылдауы енгізілуі мүмкін. Бірақ бұл мәселе аталған (Ақтөбе облысында 14 жастағы мектеп оқушысы босанды) оқиғамен байланысты емес, жалпы түрде қарастырылуда», — деді Сұлтанғазиев.

Еске салсақ, Ақтөбе облысының Ойыл ауданында мектепте сабақ кезінде оқушы қыз іші ауырғанын айтып жылаған. Артынша оның жүкті екені және толғақ қысып жатқаны белгілі болды. Оқушы босанған күнге дейін оның жүктілігін ешкім білмеген.