Енді дәрігерге шабуыл жасағандар 15 жылға дейін сотталуы мүмкін

Елімізде ақ халаттыларға шабуыл жасағандарға жаза күшейтіледі. Бұл туралы Денсаулық сақтау министрі Ақмарал Әлназарова айтты, деп хабарлайды Orda.kz. 

Күзде парламентте дәрігерлерге қоқан-лоқы көрсету мен шабуыл жасауға қатысты қылмыстық жауапкершілікті күшейтетін заң жобасы қаралады.

Енді бір медицина қызметкеріне шабуыл жасаған адам 2-7 жылға бас бостандығынан айырылады. Ал төтенше жағдайда жасалған әрекет үшін 10 жылға дейін сотталады. Бірнеше медицина қызметкеріне шабуыл жасағандар 15 жылға бас бостандығынан айырылады. Мұндай шешімге осындай оқиғалардың көбейіп кетуі себеп болды.

Айта кетейік, 17 шілде күні Қостанай облысында бір науқас дәрігерге шабуыл жасалып, ол жансақтау бөліміне түсті. Осы жағдайдан кейін Тоқаев медицина қызметкерлеріне шабуылдағандарға жазаны күшейтуді тапсырды. Мемлекет басшысының тапсырмасымен үкімет медицина қызметкерлерін қорғауды күшейту жөніндегі шаралар кешенін дайындайтын болды.