Елімізде ЖИ-мен жұмыс істеу дағдылары болмаса мемлекеттік қызметке қабылданбайды

Жасанды интеллект және цифрлық даму министрі Жасұлан Мәдиев мемлекеттік қызметкерлерді ЖИ-мен жұмыс істеуге қалай оқытып жатқаны туралы айтып берді, деп хабарлайды Orda.kz.

Әңгіме министрліктің мемлекеттік қызметкерлерге бағытталған оқыту бағдарламасы туралы болып отыр.

«Бағдарлама бүгінде 50 мың мемлекеттік қызметшіні қамтиды. Уақыт өте келе жасанды интеллект бойынша курстар олар үшін міндетті болады. Егер адам АИ бойынша курстан өтпесе немесе тиісті дағдылары болмаса, ол жұмыс істей алмайды», -  деп мәлімдеді Жасұлан Мәдиев баспасөз конференциясында. 

Оның айтуынша, бұл елдегі мемлекеттік қызмет құзыретті, тиімділігі жоғары болып, бюрократиямен күресу үшін қажет.

«Біздің ойымызша, барлық мемлекеттік қызметкерлерді ЖИ-агенттерді де, модельдерді де, мультиагенттік платформаларды да жаттықтыруға үйрету, сондай-ақ оларға тиісті ресурстарды: есептеу қуатын, деректер жиынтығын, тілдік модельдерді ұсыну қажет. Қазірдің өзінде бағдарламалау және ІТ-саласында жұмыс істеу тәжірибесі жоқ адамдар осындай агенттерді құруды үйренуге қабілетті. Біз осыны үйретеміз», -  деді ол.

Ведомствоның мәліметінше, бүгінгі таңда 3000-ға жуық мемлекеттік қызметші платформада жұмыс істеу және ЖИ-агенттерді құру бойынша оқытудан өтті.

Қазан айында «Самұрық-Қазына» ұлттық әл-ауқат қоры алғаш рет жасанды интеллект негізінде әзірленген SKAI  (Samruk-Kazyna Artificial Intelligence) жүйесін директорлар кеңесінің тәуелсіз мүшесі ретінде таныстырды.