Елімізде әлемнің жарығын сыйлаған – Аналар күні мерекесі

Мамыр айының екінші жексенбісінде елімізде Аналар күні атап өтіледі, деп хабарлайды Orda.kz.

Қазақстан Үкіметінің 2023 жылғы 31 мамырдағы қаулысында мерекелеу күні қыркүйектен мамырдың екінші жексенбісіне ауыстырылғаны белгіленген.

2024 жылы бұл мереке Қазақстанда 12 мамырда алғаш рет атап өтілді. Аналарды қорғау – мемлекеттегі әлеуметтік саясаттың басым міндеттерінің бірі екені баршаға мәлім.

«Отбасылық құндылықтарды насихаттау, отбасы институтын және тәрбиені нығайту мақсатында көптеген елде тойланатын Ана күні мен Әке күні біздің елде де ресми мереке ретінде бекітілді» деп жазылған Қазақстан Үкіметінің 2023 жылғы хабарламасында. 

Аналар күні – әлемнің көптеген елдерінде ананы құрметтеу, аналарға сүйіспеншілігі мен қамқорлығы үшін алғыс айту үшін атап өтілетін маңызды мереке.

Аналар күні мамыр айының екінші жексенбісінде АҚШ, Канада, Германия, Италия, Бельгия, Дания, Финляндия, Эстония, Түркия, Жапония, Бразилия және Австралияны қоса алғанда 20-дан астам елде атап өтіледі. Бірқатар басқа елдер бұл мерекені бөлек күндерде атап өтеді.

Аналар күні - бүкілхалықтық мереке. Бұл мереке жарық дүниеге бала әкеліп, өсірген әйелдерге ғана емес, әлемнің жарығы мен шуағын силаған анасына алғысы бар әрбір адамға да қатысты.

Әлеуметтік Кодексте балалары бар отбасыларды әлеуметтік қолдаудың қосымша шаралары көзделген, оның ішінде бала күтімі бойынша төлем мерзімі 1,5 жасқа дейін ұзартылды.

Еңбек заңнамасында жұмыс істейтін аналардың құқықтары мен міндеттері реттелген. Жұмысқа қабылдау кезінде кепілдіктер беру және жүкті әйелдер мен балалары бар әйелдерді жұмыстан шығаруға тыйым салу, үш жасқа дейінгі балалары бар аналарға жалақысы сақталмайтын қосымша демалыс беру көзделген.

 Қазақстандағы Әкелер күні маусымның үшінші жексенбісінде тойланады.