«Елді бүлікке шақырды»: Шерзат ісіндегі сотталғандардың туыстары президентке үндеу жолдады

Шерзат Полаттың ісі бойынша сотталғандардың туыстары президентке бейнеүндеу жолдады. Өз үндеулерінде олар жәбірленуші тарапты арандатуды пайдалана отырып, сотта жеңу үшін қолдан келгеннің бәрін істеді деп айыптады, деп хабарлайды Orda.kz.

Шерзат Полаттың қазасы бойынша сот ақ-қарасын ажыратып, үкім шықса да, бұл істің төңірегіндегі дау-дамай тоқтар емес. Бұл жолы сотталғандардың туыстары президент Қасым-Жомарт Тоқаевқа бейнеүндеу жасап, марқұмның отбасы арандатушылық жасау арқылы манипуляциямен полицияға қысым көрсетуге тырысты деп айыптады.

Бұл бейнежазбаны Tik-tok желісінде Бауыржан Әбдірахманов атты блогер жариялады.

Бауыржан Әбдірахманов  «сотталғандардың ата-аналары мен Талғар тұрғындарының бір бөлігінің ортақ ұстанымын» жария етті. Оның сөзінше, жасөспірімнің қазасынан кейін марқұмның туыстары оларға әлеуметтік желілер арқылы психологиялық қысым жасаған.

«Мақсаттарына жету үшін олар барлық тәсілді қолданды. Әлеуметтік желілер, тыйым салынған психологиялық әдістер, тіпті кейде ашық арандатушылыққа дейін барды», — деді ол.

Сонымен қатар, Қаржаубай Нұрымовтың Шерзат қайтыс болған түні де, інісі Нұрғанат Ғайыпбаевтың жаназасында да пышақ алып, адамдарға қарсы шыққанын және полиция қызметкерлерін де қорқытпақ болғанын айтты.

Сондай-ақ, бейнеүндеуде сотталушылардың жақындары Шерзаттың әпкесі полиция қызметкерін күрекпен ұрғанын, олардың туысы Реимова Бақыт қазақ халқына тіл тигізіп, бүлікке шақырғанын да жеткізді.

Сотталғандардың туыстары Бас прокуратура мен ҰҚК-ден марқұмның отбасының әрекеттерін тексеруді талап етті. Олар зардап шеккен тараптың әрекеттері Талғардың абыройына нұқсан келтіріп, ел ішіндегі жағдайды тұрақсыздандыруы мүмкін деп есептейді.

«Осы айтылғандарға байланысты бізде сұрақ туындайды. Біздің елде заңнан тыс өмір сүретін немесе заңнан биік тұратын қандай да бір топ бар ма? Адамдарға осылай ықпал етуді оларға кім үйретті?» – дейді туыстары.

Марқұм болған 16 жасар Шерзат Полаттың туыстары әзірге бұл жағдайға қатысты жария түрде пікір білдірген жоқ. Алайда бұған дейін олар шығарылған үкімді қанағат тұтпайтынын айтқан еді. Туыстарының айтуынша, сот айыпталушылардың әрекетін жеке-жеке қарастырмай, бұл істі топ болып кісі өлтіру ретінде қарастыруы тиіс еді.

Еске сала кетейік, 5 маусым Шерзат Полаттың сотында судья Ержан Жанұзақов тоғыз күдіктіге қатысты үкімді оқыды. Orda.kz тілшісі осы сотқа қатысып тікелей ақпарат таратып отырды. Сот 16 жасар бозбала Шерзат Полатты өлтірді деп айыпталған Абзал Шынасылды 23 жылға, ал Нұрғанат Ғайыпбаевқа пышақ тыққан Равиль Сәкиевті 20 жылға бас бостандығынан айырды. Қалғандарының қанша жылға бас бостандығынан айырылғанын толығырақ мына материалдан оқыңыздар.