Джо Байден БАҚ бостандығына қол сұғушыларға қарсы санкциялар салуды көздеп отыр

Жақын арада Америка Құрама Штаттары дүние жүзінде баспасөз бостандығын шектеуге қарсы бағытталған шаралар кешенін әзірлемек.

Бұл туралы Америка президенті мәлімдеді.

Джо Байденнің айтуынша, өткен жыл журналистер үшін, соның ішінде Газа секторындағы шайқастарды жазатын тілшілердің өліміне байланысты «ең қазалы» жыл болды.

«Алдағы апталарда Байден баспасөз бостандығына қарсы жаһандық қысымға жауап ретінде әкімшілік шара қолданады және БАҚ-тың үнін өшіргісі келетіндерге визалық тыйым салуды қолдайды»,- деді Ақ үйдің баспасөз хатшысы Карин Жан-Пьер журналистерге арналған брифингте.

Дүниежүзілік баспасөз бостандығы күні аясында АҚШ президенті дүние жүзі бойынша түрмедегі журналистерді тез арада босатуға шақырды.