«Дүниежүзілік көшпенділер ойындары»: 5,7 млрдтық ойындардың ашылу салтанаты қалай өтті?

«Астана Арена» стадионында бесінші Дүниежүзілік көшпенділер ойындары салтанатты түрде ашылды, деп хабарлады Orda.kz.

Шоуға үш мыңға жуық әртіс қатысты, ал шараның басталуы таңғажайып бейнеролик пен қатысушы елдердің шеруімен ерекшеленді.

Әлемге танымал Димаш Құдайбергенов ән салды. Сонымен қатар бұлбұл әнші Роза Рымбаева ән айтты.

Қазақстан Президенті өз сөзінде ойындардың тарихи маңыздылығын атап өтіп, ата-бабаларымыздың Батыс пен Шығыстың арасында көпір салғанын және бүгін шара арқылы сол мұраны жалғастырып жатқанымызды айтты.

 
Спорттық бағдарламада 21 спорт түрі қамтылып, 97 медаль жиынтығы сарапқа салынады. Биыл 89 елдің қатысуы, екі мыңнан астам спортшы мен ресми тұлғаның келуі, сондай-ақ 100 мыңнан астам турист келмек. Ойындарды 370 төреші қадағалайтын болады.

Дүниежүзілік көшпенділер ойындары алғаш рет 2014 жылы Қырғызстанның Шолпон-Ата қаласында өткізілді және бұл шара халықаралық дәстүрге айналды.

Салтанатты кештің толық нұсқасын «Хабар» youtubе-қа жариялады. 

Еске сала кетсек, Orda.kz Қазақстан Дүниежүзілік көшпенділер ойындарын өткізу үшін  5,7 миллиард теңге бөлетінін жазған болатын.

Әр қонаққа еліміз шамамен 1,8 миллион теңге жұмсайды. «Ұлттық және ат спорты орталығының» директоры Бақдәулет Сәбитов ойын барысында 21 спорт түрі бойынша 97 медаль жиынтығы сарапқа салынатынын айтты.

V Дүниежүзілік көшпенділер ойындары Астанада 8-13 қыркүйек аралығында өтеді. Шара кезінде қала бойынша арнайы автобустар жұмыс істеп, таңертеңгі 8.00-ден кешкі 20.00-ге дейін қатынайды.