«Дубай шоколадын» сатам деп 3 жылға сотталды

«Дубай шоколадын» сатам деген желеумен 10 адамды алаяқтықпен алдап, 300 мың теңгеден астам қаражатты жымқырған ер адамға үкім шықты, деп хабарлайды Orda.kz.  

Астана қаласының қылмыстық істер жөніндегі ауданаралық соты материалдарына сәйкес, ол Дубай шоколад сатамын деген сылтаумен 10 адамды алдап, 301 мың теңге иемденген. Айыпталушының кінәсі жәбірленушілердің көрсеткен айғақтары, банктік аударымдар туралы мәліметтер және іс материалдары негізінде дәлелденді.  

Мемлекеттік айыптаушы 3 жыл 6 айға бостандығын шектеу жазасын тағайындауды сұрады. Қорғаушы тарап айыпталушыға бас бостандығынан айырмайтын жаза тағайындауды сұраған. Сот жеңілдететін мән-жайларды ескерді, себебі айыпталушы өз кінәсін мойындап, жәбірленушілерге келтірілген шығынды өтеген. Ауырлататын жағдайлар анықталған жоқ.  

Нәтижесінде сот ер адамды кінәлі деп танып, 3 жылға бостандығын шектеу жазасын тағайындады. Үкім әлі заңды күшіне енген жоқ.