Дональд Трамп Газадағы бітімгершілік қашан күшіне енетінін айтты

АҚШ президенті Дональд Трамп «ХАМАС» Ақ үй ұсынған бейбіт жоспарға келісімін растағаннан кейін ғана Газа секторындағы оқ атуды тоқтату режимі енгізілетінін мәлімдеді. Бұл туралы ол 4 қазанда өзінің Truth Social әлеуметтік желісінде жазды, деп хабарлайды Orda.kz.

«ХАМАС келісімнің тез арада күшіне енетінін растаған соң, кепілге алынғандар мен тұтқындарды алмасу басталады және біз осы 3000 жылдық апаттың соңына жақындататын кері шегінудің келесі кезеңіне жағдай жасаймыз», - деп атап өтті Америка көшбасшысы.

Трамптың айтуынша, Израиль ХАМАС-қа хабарланған күштерді қайтарудың бастапқы желісімен келісті. Израиль тарапы бұл мәлімдемеге әзірге түсініктеме берген жоқ.

Бұған дейін АҚШ президенті Газадағы бейбіт жоспармен келісу үшін топқа 5 қазан күні кешке дейін уақыт берген болатын. Егер ондай болмаса, содырлар түбегейлі жойылады, деп мәлімдеген еді Трамп.

Бұған дейін АҚШ президенті Дональд Трамп ХАМАС қозғалысына соғыс әрекетін тоқтату жөніндегі бұрын ұсынылған келісімді қабылдауға қатысты соңғы ультиматум қойып, олай болмаған күнде «Тозақ отын жаудырамын» деп қорқытқан болатын.

Ертесі аталған топ Газа секторында ұсталған барлық израильдік тұтқындарды босатуға дайын екенін хабарлады. Бірақ олар Трамп жоспарының қалған тармақтары бойынша талқылауды талап етті.