Дер кезінде ота жасағанда Шерзатты аман алып қалуға болар еді — сарапшы

Қоғамды дүр сілкіндірген 16 жастағы Шерзат Полаттың өліміне қатысты сот отырысы өтіп жатыр. Талдықорғандағы сотқа Orda.kz тілшісі қатысып, тікелей ақпарат таратып отыр. Бүгін сарапшылар дер кезінде медициналық көмек көрсеткенде Шерзатты аман алып қалуға болатынын айтты.

Сарапшының айтуынша, егер Шерзат Полатқа дер кезінде шұғыл медициналық көмек көрсетіліп, ота жасалғанда оның өмірін сақтап қалуға болар еді.

Сараптама қорытындысына зер салсақ, өлімге себеп болған — көкірек қуысына сұғылған пышақ жарақаты. Пышақ сол жақ жауырынның астынан, бесінші және алтыншы қабырғаның арасына кіріп, көкірек қуысына өткен. Мұндай жарақат — адам өміріне аса қауіпті саналады.

Бұдан бөлек, марқұмның сол жақ көзінің астына соққыдан қан құйылып, ұйып қалғаны анықталған. Мұндай жаралар саусақ арасында және бастың кей тұстарында да байқалған. Алайда сот-медициналық сарапшысының айтуынша, марқұм бұл жарақаттардың әсерінен емес, дәл пышақ жарақатынан көз жұмған.