Депутат Қызылордада жазасын өтеп жатқан Думан Мұхаммедкәріммен кездесті

Депутат Ермұрат Бәпи Қызылордадағы колонияда жазасын өтеп жатқан журналист Думан Мұхаммедкәрімді барып көрді. Депутат оның жағдайы мен колониядағы ахуалы туралы Facebook-парақшасында жазба жариялады, деп хабарлайды Orda.kz.

Бәпидың айтуынша, Думан қамауда қатты арықтап кеткен. Жуырда ғана тағы бір аштықты тоқтатқан. 

«Екеуара екі сағатқа жуық әңгімелестік. Сол баяғы Думан: бірбеткей, тікмінез, турашыл. Сот үкімімен таңылған жазаны мойындамайды. Бұдан бір жарым жыл бұрын Талдықорған уақытша ұстау изоляторында кездескен кезге қарағанда, біраз жүдеу тартқан. Мен келерден бір күн бұрын (20.11.25) кезекті аштықтан шығыпты. «құрғақ аштық па?» десем: «Жоға, сұйық ішпесең, үш-төрт күннен кейін шатырың кетіп қалады» деп күледі. Бостандықта жүрген кезіндей, әзілден кенде емес. Өр мінезінен айнымаған. Басты айнадай қылып, ұстарамен қырып тастаған. «Неге қырдың?» десем, «Гигиена, кичада душ жоқ қой...» деп тағы да әзілдейді. Кичасы — карцер, Қызылордаға этаппен келгеннен бергі жалғыз адамдық мекені. Колония тәртібіне бағынбағандықтан, режимнің талабы бойынша осындай ішкі жазаға кесілген. Себебі — мекеменің жалпыға ортақ киімін киюден бас тартқан», деп жазды Бәпи.

Депутаттың сөзінше, журналистің денсаулығы нашарлап кеткен. Аштықтың салдарынан оның бүйрегі, белі және асқазаны ауырады.

Бәпи колония басшылығынан камераға тасталды деп айтылған жарылғыш зат жөнінде де сұрады. Оған мынадай жауап берілген:

«Бұл жағдай тексерілуде. Бірақ мұндай қарабайыр әрекетті Мұхамедкәрімге қатысты қастандық жасалған деп бағалауға болмайды. Егер шынында да түрмеде отырған әлдекімге (Думанға ғана емес) қастандық ұйымдастырылатын болса, әдетте ондай іс даңғаза дабырамен жасалмайды ғой. Сондықтан бұл Думанның төңірегіндегі қоғамдық у-шуды қоздыру үшін әлдекімдер сырттан ұйымдастырған арандатушылық», деді Бәпи.

Депутат бұл уәжді қисынды деп тапты. Оның айтуынша, түрмеде отырған, қорғансыз, «саяси тұтқын» саналған адамға қастандық ұйымдастырудың еш мәні жоқ.

Еске сала кетсек, «тыйым салынған ұйым ісіне араласу» және «экстремизмді қаржыландыру» айыптары тағылған Думан Мұхаммедкәрімге Қонаев қалалық соты 7 жылға бас бостандығынан айыру туралы үкім шығарды.