Дәрігерлер салғырттығы: 18 онкологиялық науқас мүгедектік алу мүмкіндігінен айырылды

Жетісу облысында дәрігерлердің салғырттығынан 18 онкологиялық науқас мүгедектік алу мүмкіндігінен айырылды, деп хабарлайды Orda.kz облыстық прокуратураның баспасөз қызметіне сілтеме жасап.

«Прокурорлар 2024 жылы медициналық ұйымдар III-IV топтағы онкологиялық аурумен есепте тұрған облыстың 18 тұрғынын медициналық-әлеуметтік сараптамаға жібермегенін анықтады. Анықтама үшін: медициналық-әлеуметтік сараптама – бұл тексерілетін адамның клиникалық, функционалдық, әлеуметтік, кәсіби және психологиялық деректерін талдау негізінде организмді кешенді бағалау. Осылайша, олар мүгедектік бойынша тіркелу және кепілдендірілген әлеуметтік жәрдемақы алу мүмкіндігінен айырылды», делінген хабарламада.

Атап өткендей, прокурорлық қадағалау актісі бойынша заң бұзушылықтар жойылды, барлық науқастар медициналық-әлеуметтік сараптамаға жіберілді, олардың екеуі әлеуметтік төлемдер тағайындау арқылы мүгедектік мәртебесін алды, ал қалғандары бойынша жұмыс жүргізілуде. 

«Азаматтардың әлеуметтік қамсыздандыру құқығын бұзған үш медицина қызметкері жауапкершілікке тартылды», деп толықтырды қадағалау органы.