Cтуденттерді шетелге оқуға жібереміз деп, 200 млн теңгеге алдады

«Zeyn Qoi» білім беру орталығы шетелдік жоғары оқу орындарына түсу емтихандарына толық дайындалуға және барлық кезеңде қолдау көрсетуге уәде берді. Соның ішінде: ел таңдау, емтиханға дайындалу, сұхбаттасу ұйымдастыру, виза алуға көмектесу және әуежайда кездесу. Алайда бұл уәделер жалған болып шықты.

Алматы тұрғындары мәселені шешуге көмектесуін сұрап, қала әкімі Ерболат Досаевқа үндеу жолдады. 

Олардың пікірінше, қазақстандық доменіндегі Zeyn Qoi ресми сайты көрнекті келбет пен оң пікірлер ұсынып, жұмысын жалғастыруда. Әлеуетті клиенттер сайттағы сауалнаманы толтыра отырып, алаяқтардың құрбаны болуы мүмкін.

Ата-аналар Дәулет Түймебай жетекшілік ететін серіктестік шетелден білім алу үшін ақша алғанымен, келісім шарт талаптарын орындамағанын алға тартады. Соңғы жарты жылда компания тұтынушылардың ақшасын алдап иемденіп, жалпы шығын көлемі 200 миллион теңге болып отыр. Дәулет Түймебайдың ақшаны қайтараратын ниеті жоқ.

Сонымен қатар, жәбірленушілер Түймебайдың Focus Foundation деп аталатын тағы бір компания ұйымдастырып, осыған ұқсас жолмен ақша жинайтынын айтады. Ата-аналар Дәулет Түймебайдың әкесі бұл істі тергей алатын адамдарға қысым көрсетпейді деп үміттенеді.