Бұрынғы депутат, G-Park директоры БАҚ-қа қысым жасады: Аида Балаева журналистерді қолдады

Мәдениет және ақпарат министрі Аида Балаева Dalanews және Dala Inside журналистерінің Астана мәслихатының бұрынғы депутаты, G-Park құрылыс компаниясының қожайыны Ғабит Сәтмағамбетовтің қысым көрсетуіне байланысты шағымына қатысты пікір білдірді.

Ол бұл жағдайға алаңдайтынын айтты.

Журналистер бұған дейін Аида Балаеваға үндеу жолдаған. Онда олар экс-депутат Ғабит Сәтмағамбетовтің қызметіне қатысты бірнеше материал жариялаған соң қысымға түскендерін айтқан.

Атап айтқанда, Dalanews басылымы Сәтмағамбетовтың Дубайда екенін алға тартқан материал жариялады. Экс-депутат ​​Астанадан шықпағанын айтып, журналистерді өз сөздерін теріске шығаруға мәжбүрлеген. Осыдан кейін ақпарат көзін ашуды талап етіп, БАҚ өкілдері жауапқа шақырыла бастады.

Журналистер бұрынғы депутаттың қысымынан редакцияда тінту қаупі бар екенін, тіпті кейбір қызметкерлердің қамауға алынуы мүмкін екенін айтып шағымданды.

Аида Балаева Қазақстанда Конституцияға сәйкес цензураға тыйым салынғанын, журналистердің авторлық және мұндай ақпаратты сот жария етуді талап ететін жағдайларды қоспағанда, ақпарат көздері құпиясын сақтауға құқығы бар екенін ерекше атап өтті.

«Dalanews редакциясы бұрын жарияланған ақпаратты жоққа шығаратын мақала жариялап үлгерді, осылайша БАҚ-тың қолданыстағы заңнамсына сәйкес міндетін орындады. Министрлік жағдайды ерекше бақылауда ұстап, аталған БАҚ-ты ықтимал қысымнан қорғау мақсатында құқық қорғау органдарымен бірлесіп тиісті жұмыстарды атқарып жатыр»,-  деп атап өтті Аида Балаева.

Экс-депутат Сәтмағамбетовке тиесілі G-Park компаниясы үлескерлер ақшасына салған бірнеше үйді уақытында аяқтай алмауымен аты шықты. Астана әкімі Жеңіс Қасымбек құрылыс салушы «осы мәселелердің барлығын жедел түрде жойып жатқанын» хабарлады. Компанияға проблемалық нысандарды пайдалануға бермейінше елордада жаңа жобаларды бастауға тыйым салынды. 2023 жылдың жазында G-Park бір уақытта 16 нысанның құрылысын жүргізді, олардың кейбіреулері қадағалау органдары тарапынан компанияға қатысты сұрақ туғызды.