Бұл – рейд емес: Қорғаныс министрлігі әскерге көшеден ала қашудың себебін түсіндірді

Жастарды көшеден бірден «тізгіндеп алып» кетіп жатқаны туралы видеолар тарағаннан кейін, Қазақстанның Қорғаныс министрлігі түсініктеме берді: әскерге шақырылушыларға қатысты ешқандай заңсыз «аулау» жүргізіліп жатқан жоқ. Алайда, кейбір «жағдайлардың» бар екнені рас, деп хабарлайды Orda.kz.

Жуырда әлеуметтік желілерде көктемгі әскерге шақыру науқаны аясында қазақстандық жастардың жаппай «ұсталуы» түсірілген видеолар тарады. Кадрларда – әскери комиссариатқа күштеп әкетіліп жатқан жігіттер көрсетілген. Жаппай үрей басып, халық алаңдаушылық білдірген соң Қорғаныс министрлігі ресми мәлімдеме жасады.

Айтуларынша, бұл – рейд емес, әскерге шақырудан жалтарып жүргендерді заңды түрде шақыру пунктіне жеткізу.

Министрлік өкілдері әскерге шақыру қағазын  жеке тапсыру кейде қиынға соғатынын мойындады. Көптеген шақыру алуға тиіс азаматтар тіркеуде тұрған мекенжайында тұрмайды және әскери комиссариатқа нақты мекенжайын хабарламайды. Мұндай жағдайда іске полиция араласады – олар азаматтарды шақыру пунктіне жеткізумен айналысады екен.

«Егер шақырту қағазын жеке табыстау мүмкін болмаса, шақырылған азаматты жеткізу ішкі істер органдарына жүктеледі. Кейбір азаматтар полиция қызметкерлерінің заңды талабына бағынбай, қарсылық көрсетеді. Мұндай жағдайда оларды шақыру пунктіне мәжбүрлі түрде жеткізуге тура келеді»,  деп түсіндірді ведомство. 

Қазіргі уақытта 2GIS қосымшасында жастар бір-бірін мүмкін болатын «ұстау» әрекеттері туралы ескертіп жатыр.

Сондай-ақ Қорғаныс министрлігі әскери қызметтен жалтарғандар әкімшілік айыппұлмен қатар, қылмыстық жауапкершілікке де тартылуы мүмкін екенін еске салды.

Қорғаныс министрлігі әскер жасындағы азаматтарға қатысты рейдтер туралы былтыр да дәл осындай түсініктеме берген болатын.

Бұл жылда әскерге «жинаудың» жабайы маусымына айналып бара жатқан жоқ па? Зайырлы мемлекетте зайырлы қатынас болуы тиіс емес пе?!

Көшеден әскерге сүйрелгендер заң тұрғысында  сотқа шағымдана ала ма? 

Әскерге сау кетіп, жарымжан немесе мүгедек болып оралған азаматтардың ісіне кім жауап береді? Тілшіміздің   «Әскердегі азап»: Сарбаз жансақтау бөлімінен жарымжан халде шықты мақаласын қараңыз.

2024 жылы 12 маусымда Алматы қаласында Адам құқықтары мен заңдылықты сақтау жөніндегі екінші баспасөз-конференциясы өтті. Конференция отырысына 5571 әскери бөлімде ажал құшқан Алмас Шахимовтың анасы мен әжесі, дәл осы әскери бөлімде азаматтық борышын өтеу кезінде комаға түскен Мұхтар Ербаянның анасы мен бөлесі қатысты.

 
Былтыр Түркістан облысы, Арыс гарнизонында келісімшарт бойынша әскери қызметте болған сарбаз өз-өзіне қол жұмсамақ болды.

Айта берсек мұндай мысалдар толып жатыр, сол арқылы әскердегі тәртіп пен жағдай түзелмейінше ешбір ата-ана бауыр еті баласын әскерге аттандыруға құштар болып отырмағанын түсінуге болады.