Болат Назарбаевқа тиесілі базарда дау шықты

Болат Назарбаевқа тиесілі базарда саудагерлер базар басшылығы шығарған шешімге наразы болды, деп хабарлайды, Orda.kz.

Алматыда Райымбек пен Механика көшелерінің қиылысындағы «Оптовка» маңына жүзге жуық адам жиналды, олар автотұрақты алып қоюға қарсы шықты. Жиналған саудагерлер, жүк тасушылар және өзге де базар қызметкерлері әкімдіктің жүк көліктері келіп, тауар түсіріп, жүктейтін автотұрақты жою туралы шешіміне наразы екендерін айтты.

«Егер тұрақ болмаса, жұмыс та болмайды. Біздің жұмысымыз сол тұрақтың көлеміне байланысты. Тұрақ қаншалықты үлкен болса, соншалықты көп адам келеді, «Барыс-4» базарында (ол әлі күнге дейін марқұм Болат Назарбаевтың атына тіркелген) жүк тиеп алады. Аймақтан келетіндердің бәрі осы КАМАЗ тұрағын жақсы біледі», — дейді саудагерлердің бірі.

Жиналғандарға бұл жердің не үшін босатылып жатқаны нақты айтылмады.

Orda.kz тілшісі оқиға орнында болып, жағдайдың қалай өрбитінін бақылап отыр. Осы мәселеге қатысты алда репортаж жариялаймыз.