Блогерлер Ерболат Жанабілов пен Эльмира Төлегенова түрмеге қамалуы мүмкін

Қаржылық мониторинг агенттігі блогер Жанәбіловтерге қатысты қылмыстық іс қозғады, деп хабарлайды Orda.kz

Жанәбіловтерге қылмыстық кодекстің 214-бабының 1-бөлігі бойынша іс қозғалды. Қазір тергеу басталды. Қылмыстық кодекстің 214-бабының 1-бөлігі уәкілетті органда тіркелмей кәсіпкерлік қызметпен айналысқаны үшін жауапкершілікті қарастырады. Жаза ретінде 2000 айлық есептік көрсеткішке дейін айыппұл, сол мөлшерде түзеу жұмыстары, не 2 жылға дейін бас бостандығын шектеу немесе айыру көзделген.

«Іс қозғалды, қазір тергеу жүріп жатыр. Жақында тіркелді. Блогерлер Қазақстанда», — деді агенттік өкілі Жеңіс Елемесов.

Естеріңізге сала кетейік, блогерлердің ісі алғашқыда әкімшілік құқық бұзушылық ретінде қаралған еді, бірақ кейін бұл әрекеттер қылмыстық құқық бұзушылық ретінде бағаланып, жаңа тергеу басталды. Адвокат Олег Чернов өз қорғауындағы блогерлердің әрекеттерінде қылмыстық құқық бұзушылық жоқ деп санайды.

18-21 тамыз аралығында Ерболат Жанәбілов пен Эльмира Төлегенова автокөлік ұтыс ойынын жариялаған. Пайдаланушылар тікелей эфирді күтеді, бірақ оларға ақылы оқуға сілтеме жіберілген, оның бағасы 30 мың теңге болған. Ұтысқа қатысу үшін курсты сатып алу шарты қойылған, бұл қоғам тарапынан үлкен сынға ұшырады.

Туризм және спорт министрлігі ресми лотерея операторлары мен агенттерінен басқа ешкімге ұтыс ұйымдастыруға және билет сатуға болмайтынын ескертті.