«БҚО-да оқушы өз-өзіне қол жұмсады»: мектеп директоры мен психологқа қатысты тергеу басталды

БҚО прокурорының орынбасары Азамат Құстанов облыста балалар суицидінің 27%-ға өскенін мәлімдеді. Облыс республика бойынша көш бастап тұр екен, деп хабарлайды Orda.kz. 

Прокурор орынбасарының айтуынша, балалар суицидінің себептерінің бірі — жауапты адамдардың немқұрайлылығы. Азамат Құстанов Ақжайық ауданындағы мектепті мысалға келтірді. Аудандағы мектептердің бірінде жасөспірім өз-өзіне қол жұмсау ниеті барын жазып, сауалнама толтырған. Ал мектеп психологы мәліметті мектеп басшылығына жеткізбеген. Көп ұзамай жасөспірім өзіне қол жұмсайды. Қазіргі таңда психологқа, мектеп директорына және оның орынбасарына қатысты сотқа дейінгі тергеу басталды. 

Айта кетейік, кеше, 22 қазан күні Қырғызстанның Ош қаласында қайғылы жағдай болды. Өрт салдарынан 34 жастағы әйел мен оның 13, 11, 9, 6 және 2 жастағы балалары қаза тапты.