Бишімбаевтың інісі рақымшылық алып, бостандыққа шыға ма?

ҚР ішкі істер министрі Ержан Сәденов бұл сұраққа нақты жауап бермеді. Алайда оның айтуынша, Бақытжан Байжанов шартты түрде мерзімінен бұрын босап шығуға өтініш бермеген, деп хабарлайды Orda.kz.

Еске салайық, Бақытжан Байжанов Салтанат Нүкенованың өліміне қатысты атышулы іс бойынша қылмысты жасырып қалғаны үшін төрт жылға бас бостандығынан айырылған болатын.

«Мерзімінен бұрын босату тек сот шешімімен жүзеге асады. Бишімбаевтың інісіне қатысты айтсақ, бұл жөнінде бізге ешқандай құжат түскен жоқ», — деді министр.

Жуырда әлеуметтік желілерде оның мерзімінен бұрын босатылуы мүмкін деген ақпарат тарады. Себебі Қазақстан Конституциясының 30 жылдығына орай елде 15 мыңға жуық тұтқын рақымшылық алғалы жатыр.

Айта кетейік, Бишімбаевтың өзі рақымшылық алмайды. Өйткені «адам өлтіру» бабы бойынша экс-экономика министрі Қуандық Бишімбаев 24 жылға сотталған болатын. Мұндай баппен сотталғандар рақымшылық ала алмайды.

Ал оның інісі заң бойынша, рақымшылық алуы әбден мүмкін.