«Белдікпен буындырды»: Маңғыстауда жолаушылар такси жүргізушісіне шабуыл жасады

Маңғыстау облысы Түпқараған ауданында такси жүргізушісіне екі жолаушы шабуыл жасады. Қаскөйлер оны буындырып өлтірмек болған. Кейін көлігін айдап кеткен, деп хабарлайды Orda.kz.

ІІМ-нің мәліметіне қарасақ, оқиға Түпқараған ауданында болған. Екі ер адам таксиге отырып, Ақшұқыр ауылының шетіне жеткенде, жүргізушіге күтпеген жерден шабуыл жасаған. Олар қауіпсіздік белдігін жүргізушінің мойнына орап, буындырмақ болған. Артынша оны көліктен шығарып, Hyundai Accent маркалы автокөлігін айдап кеткен. Бақытына орай тұншыққанына қарамай, жүргізуші аман қалған. 

«Жедел іздестіру шаралары нәтижесінде күдіктілер ұсталып, уақытша ұстау изоляторына қамалды. Бұл дерек бойынша қылмыстық іс қозғалды»,  деп хабарлады ҚР Ішкі істер министрлігі. 

Күдіктілер ұсталды. Тергеу амалдары жүріп жатыр.

Еске сала кетсек, Алматы облысында 10 жастағы Максим Головачёв есімді оқушыға ойын алаңқайында ойнап жүрген кезде бірнеше ірі төбет шабуыл жасап, ауыр жарақаттаған еді. Бет-аузы тырналған, иттер тістемеген жері қалмаған. Бала бір құлағынан айырылды.